Titina

La titina, ye la proteína más grande que se conoz,^[1] con una masa molecular de 3 a 4 millones Da. El xen que la codifica (TTN, con 281 kb^[2]) contién 363 exones, más que nengún otru.

La proteína ta formada por múltiples dominios, aproximao 244, que contribúin a la so estructura. Estos dominios respuenden a la tensión esplegándose y volviendo a renaturalizarse, de manera que la cadena polipeptídica actúa como un resorte dientro del sarcómero, unidá funcional y contráctil del músculu. Esta proteína ye importante na contraición del músculu estriáu y los sos texíos asociaos. Actúa coneutando la llinia Z cola llinia M nel sarcómero, de cuenta que contribúi a la tresmisión de fuercia na llinia Z y llibera tensión na rexón de la banda I. Amás, llinda'l marxe de movimientu del sarcómero cuando ésti se tensiona, apurriendo al músculu cierta rixidez. Mientres la relaxación, la titina xenera tensión pasivo por aciu estensión elástica cuando se distiende'l sarcómero. Les variaciones na secuencia de la titina ente los distintos tipos de músculu hanse correlacionado con diferencies nes propiedaes mecániques de los mesmos.

1. ↑ Kierszbaum, Abraham L. (2009). Histología y bioloxía celular. Elsevier Mosby, páx. 671. ISBN 978-84-8086-313-1.
2. ↑ Entrez Gene. «TTN titin [ Homo sapiens ]». Consultáu'l 3 d'ochobre de 2012.